Tachwedd 2007 Fersiwn 14

Ffurfiant ac Enwau – GBLLP1

Cynnwys

Atodiadau

Canllaw yn unig yw hyn a dylid ei ddarllen ar y cyd â’r ddeddfwriaeth berthnasol.

Cyflwyniad

Mae’r llyfryn hwn yn sôn am y gofynion ar gyfer corffori partneriaethau atebolrwydd cyfyngedig. Mae’n gymwys i bartneriaethau atebolrwydd cyfyngedig wedi eu ffurfio a’u cofrestru yng Nghymru, Lloegr a’r Alban. Ymdrinnir â’r dogfennau ffurfio, aelodau partneriaethau atebolrwydd cyfyngedig, a’r rheolaeth sy’n gymwys i’r ffordd y defnyddir rhai enwau ar bartneriaethau atebolrwydd cyfyngedig. Mae hyn yn cynnwys:

• y rheolau a’r cyfyngiadau o ran dewis enw i bartneriaeth atebolrwydd cyfyngedig, a hynny wrth ffurfio partneriaeth felly ac wrth newid ei henw;
• sut i newid enw partneriaeth atebolrwydd cyfyngedig;
• pa bryd na fydd Tŷ’r Cwmnïau yn cofrestru enw ar bartneriaeth atebolrwydd cyfyngedig a pha bryd y bydd angen cyfiawnhau defnyddio geiriau neu ymadroddion sensitif neu angen cymeradwyaeth flaenorol gan awdurdod cydnabyddedig; a
• pha bryd y gallwch chi wrthwynebu enw arbennig ar bartneriaeth atebolrwydd cyfyngedig, a hefyd beth i’w wneud os gwrthwynebwyd enw’ch partneriaeth atebolrwydd cyfyngedig a’ch bod yn cael eich cyfarwyddo gan yr Ysgrifennydd Gwladol i newid yr enw.

Rhaid i bob partneriaeth gorfforedig ddatgelu gwybodaeth arbennig i Dŷ’r Cwmnïau er mwyn y cofnod cyhoeddus, ac i’r bobl y deliant â nhw. Mae’r llyfryn hwn yn dweud wrthych chi:

• ble mae’n rhaid ichi ddangos enw’r bartneriaeth atebolrwydd cyfyngedig a pha wybodaeth y mae’n rhaid iddi ymddangos ar ddeunydd ysgrifennu’r bartneriaeth; a
• pha bryd y mae’n rhaid rhoi gwybod i Dŷ’r Cwmnïau am newidiadau i sefyllfa a manylion y bartneriaeth atebolrwydd cyfyngedig.

Dim ond fel arweiniad i’r rhwymedigaethau parhaol hyn y bwriedir y llyfryn yma. Sonnir yn y testun am lyfrynnau eraill yn y gyfres hon: mae’r rheiny’n ymdrin yn fanylach â phynciau unigol.

Fe welwch chi’r gyfraith berthnasol yn Neddf Partneriaethau Atebolrwydd Cyfyngedig 2000, ac yn Rheoliadau Partneriaethau Atebolrwydd Cyfyngedig 2001 sy’n cymhwyso rhannau o Ddeddf Cwmnïau 1985 (fel y’i diwygiwyd ym 1989 ac wedyn) at bartneriaethau atebolrwydd cyfyngedig. Wrth gyfeirio at ‘y rheoliadau’ yn y llyfryn hwn, golygwn Reoliadau Partneriaethau Atebolrwydd Cyfyngedig 2001.

PENNOD 1

Partneriaethau atebolrwydd cyfyngedig newydd

1 Beth yw partneriaeth atebolrwydd cyfyngedig?

Mae partneriaeth atebolrwydd cyfyngedig yn fath newydd o endid busnes cyfreithiol ac iddo atebolrwydd sydd wedi ei gyfyngu.

2 Beth yw’r gwahaniaeth rhwng partneriaeth atebolrwydd cyfyngedig a chwmni cyfyngedig?

Y prif wahaniaeth yw bod partneriaeth atebolrwydd cyfyngedig â hyblygrwydd trefniadol partneriaeth a’i bod yn cael ei threthu fel partneriaeth. O ran agweddau eraill, mae’n debyg iawn i gwmni.

3 Pwy gaiff ffurfio partneriaeth atebolrwydd cyfyngedig?

Yn gyffredinol, mae’r Ddeddf yn caniatáu i ddau neu ragor o bersonau sydd â chydberthynas at ddibenion dilyn busnes cyfreithlon gyda golwg ar wneud elw, ffurfio partneriaeth atebolrwydd cyfyngedig drwy danysgrifio i’w dogfen gorffori – Ffurflen LLP2. (O dan y gyfraith, mae ‘person’ yn cynnwys unigolion a chwmnïau.) Ond nid yw partneriaethau atebolrwydd cyfyngedig ar gael i bob gweithgarwch, fel gweithgareddau dielw.

4 Sut dylwn i ffurfio partneriaeth atebolrwydd cyfyngedig?

Bydd angen ichi anfon Dogfen Gorffori Ffurflen LLP2, gyda’r ffi gofrestru (gweler cwestiwn 11 isod), at y Cofrestrydd Cwmnïau.

5 Beth yw Dogfen Gorffori (Ffurflen LLP2)?

Mae’r ffurflen hon yn nodi:

• enw’r bartneriaeth atebolrwydd cyfyngedig;

• lleoliad swyddfa gofrestredig y bartneriaeth atebolrwydd cyfyngedig (Cymru, Lloegr neu’r Alban);

• cyfeiriad y swyddfa gofrestredig;

• enw, cyfeiriad llawn a dyddiad geni pob aelod; a

• pha rai o’r bobl hyn sydd i fod yn aelodau dynodedig, neu fod pob aelod yn aelod dynodedig.

Mae Ffurflen LLP2 yn cynnwys datganiad cydymffurfio y mae’n rhaid i gyfreithiwr neu aelod arfaethedig ei lofnodi. Rhaid i bwy bynnag sy’n llofnodi’r datganiad nodi ym mha rinwedd y mae’n llofnodi’r ffurflen. Rhaid i bob aelod a phob aelod dynodedig lofnodi a dyddio’r ddogfen gorffori i gadarnhau ei barodrwydd/pharodrwydd i weithredu.

6 Beth yw swyddfa gofrestredig?

Dyma gyfeiriad y bartneriaeth atebolrwydd cyfyngedig yr anfonir llythyrau a nodiadau atgoffa Tŷ’r Cwmnïau iddo. Gall y swyddfa gofrestredig fod unrhyw le yng Nghymru a Lloegr (neu’r Alban os yw’ch partneriaeth atebolrwydd cyfyngedig wedi ei chofrestru yno). Rhaid i’r swyddfa gofrestredig bob amser fod yn gyfeiriad effeithiol ar gyfer cyflwyno dogfennau i’r bartneriaeth atebolrwydd cyfyngedig, ac i osgoi unrhyw oedi mae’n bwysig bod pob gohebiaeth a anfonir i’r cyfeiriad hwn yn cael sylw prydlon. Os bydd partneriaeth atebolrwydd cyfyngedig yn newid cyfeiriad ei swyddfa gofrestredig ar ôl corffori, rhaid rhoi gwybod i Dŷ’r Cwmnïau am y cyfeiriad newydd ar Ffurflen LLP287.

7 Beth yw nifer isaf yr aelodau dynodedig sydd angen ar bartneriaeth atebolrwydd cyfyngedig?

Rhaid i bob partneriaeth atebolrwydd cyfyngedig fod bob amser ag o leiaf dau aelod dynodedig wedi eu penodi’r ffurfiol. Os ceir llai na dau aelod dynodedig, yna ystyrir bod pob aelod yn aelod dynodedig. (Gall y bartneriaeth atebolrwydd cyfyngedig fod wedi penderfynu y bydd pob aelod yn ddynodedig neu mai rhai aelodau yn unig fydd yn ddynodedig – gweler cwestiwn 5 uchod).

Wedi corffori, mae’n rhaid ichi ddweud wrth Dŷ’r Cwmnïau am:

• benodi aelod neu aelod dynodedig newydd – defnyddiwch Ffurflen LLP288a;

• aelod neu aelod dynodedig sy’n rhoi heibio i weithredu o dan y bartneriaeth atebolrwydd cyfyngedig – defnyddiwch Ffurflen LLP288b;

• newidiadau i enw neu gyfeiriad unrhyw aelod neu aelod dynodedig neu i unrhyw rai o’r manylion eraill a gofrestrwyd yn wreiddiol ar Ffurflen LLP2 – defnyddiwch Ffurflen LLP288c;

• newidiadau i statws unrhyw aelod (o aelod i aelod dynodedig neu’r ffordd arall) – defnyddiwch Ffurflen LLP288c;

• gwrthdroi penderfyniad mai pob aelod neu aelodau arbennig yn unig fydd yn aelodau dynodedig – defnyddiwch Ffurflen LLP8. (Gellir hefyd fynnu Ffurflenni LLP288c sy’n newid statws pob aelod).

8 Beth yw’r gwahaniaeth rhwng aelod ac aelod dynodedig?

Gyda chydsyniad yr aelodau eraill, gall aelod fynd yn aelod dynodedig unrhyw adeg. Mae gan aelodau dynodedig yr un hawliau a dyletswyddau tuag at y bartneriaeth atebolrwydd cyfyngedig ag unrhyw aelod arall. Llywodraethir yr hawliau a’r dyletswyddau cilyddol hyn gan gytundeb y bartneriaeth atebolrwydd cyfyngedig a chan y gyfraith yn gyffredinol. Ond mae’r gyfraith hefyd yn gosod cyfrifoldebau ychwanegol ar aelodau dynodedig. Yn fwyaf arbennig, mae aelodau dynodedig yn gyfrifol am:

• benodi archwilydd ariannol (os oes angen un);

• llofnodi’r cyfrifon ar ran yr aelodau;

• cyflwyno’r cyfrifon i’r Cofrestrydd;

• rhoi gwybod i’r Cofrestrydd am unrhyw newidiadau i’r aelodaeth neu newid o ran cyfeiriad y swyddfa gofrestredig neu enw’r bartneriaeth atebolrwydd cyfyngedig;

• paratoi, llofnodi a chyflwyno i’r Cofrestrydd adroddiad blynyddol (Ffurflen LLP363); a

• gweithredu ar ran y bartneriaeth atebolrwydd cyfyngedig os caiff ei dirwyn i ben a’i diddymu.

Mae aelodau dynodedig hefyd yn atebol o dan y gyfraith am unrhyw fethiant i fodloni’r cyfrifoldebau cyfreithiol hyn.

9 Beth sy’n digwydd i’r dogfennau a anfonir at y Cofrestrydd?

Mae pob dogfen yng nghyswllt ffurfio partneriaeth atebolrwydd cyfyngedig yn agored i archwiliadau arbennig, gan gynnwys gwirio darpar-aelodau yn ôl y cofrestri sy’n nodi cyfarwyddwyr ac aelodau a gafodd eu gwahardd.

Wedyn, bydd y Cofrestrydd yn cadw’r dogfennau a gyflwynwyd iddo ac yn trefnu iddynt fod ar gael i’w harchwilio gan y cyhoedd.

10 Alla i ddewis unrhyw enw fynna i i’m partneriaeth atebolrwydd cyfyngedig?

Na allwch. Mae rhai cyfyngiadau ar eich dewis. Mae Pennod 2 o’r llyfryn hwn yn egluro sut y gall y cyfyngiadau hynny effeithio ar eich dewis.

Ni ellir neilltuo enwau ac ni chaiff ceisiadau ffurfio mo’u prosesu’n gaeth yn nhrefn amser na dyddiadau derbyn.  Go brin y cawn fwy nag un cais am gofrestru’r un enw, ond os digwydd hynny dim ond un gaiff ei gofrestru. Fe gâi’r ail un ei wrthod oherwydd y byddai’r enw hwnnw eisoes ar y mynegai enwau. Ni ellir gwarantu pa gais gaiff ei brosesu gyntaf. At ei gilydd, bydd ceisiadau corffori cwmni a gyflwynir yn electronig yn cael eu prosesu ynghynt na cheisiadau eraill ar bapur, gan gynnwys ceisiadau PAC.

11 Faint mae Tŷ’r Cwmnïau yn ei godi am gorffori partneriaeth atebolrwydd cyfyngedig?

Y ffi gofrestru o dan y gwasanaeth safonol yw £20. Ffi’r gwasanaeth premiwm yw £50. Dylid gwneud sieciau’n daladwy i “Tŷ’r Cwmnïau”.

Os dewiswch y gwasanaeth premiwm, fe wnawn ein gorau i gorffori’r bartneriaeth atebolrwydd cyfyngedig yr un diwrnod â derbyn y dogfennau ffurfio, cyhyd â’ch bod yn eu cyflwyno inni, wedi eu cwblhau’n gywir ac ar ddiwyg derbyniol, cyn 3pm. Os byddwn am unrhyw reswm yn methu rhoi ichi wasanaeth yr un diwrnod, byddwn yn ad-dalu gwahaniaeth y gost rhwng y gwasanaeth safonol a’r gwasanaeth premiwm.

Os postiwch eich cais am wasanaeth yr un diwrnod, fe wnawn bob ymdrech i gofrestru yr un diwrnod ag y bydd yn dod i law. Os yw’ch cais yn un taer, hwyrach y byddwch am ystyried a fyddai’n ddoeth defnyddio Gwasanaeth Dosbarthu Arbennig y Post Brenhinol.

12 Ble alla i gael ffurflen i gorffori partneriaeth?

Mae Ffurflen LLP2 ar gael ar ein gwefan yn www.companieshouse.gov.uk neu gan swyddfeydd Tŷ’r Cwmnïau fel ar ddiwedd y llyfryn hwn. Gellir hefyd gael y ffurflen gan ddogfenwyr cyfreithiol, cyfrifwyr, cyfreithwyr neu asiantiaid ffurfio. Gwelir enwau a chyfeiriadau’r rhain mewn llyfrau ffôn ar gyfer busnesau.

13 Alla i ddelio’n uniongyrchol â Thŷ’r Cwmnïau i ffurfio fy mhartneriaeth atebolrwydd cyfyngedig?

Gallwch. Ond, er y bydd ein staff yn falch o roi ichi gyfarwyddyd ynglŷn â materion cyffredinol (megis llenwi ffurflenni neu gyngor ynghylch enwau partneriaethau atebolrwydd cyfyngedig), ni allant eich cynghori ai partneriaeth atebolrwydd cyfyngedig yw’r cyfrwng gorau i’ch busnes.

Os ydych yn ansicr ynglŷn ag unrhyw agwedd ar ffurfio partneriaeth atebolrwydd cyfyngedig, byddwch cystal â cheisio cyngor proffesiynol eich cyfreithiwr, eich cyfrifydd neu’ch asiant ffurfio.

PENNOD 2

Dewis enw i bartneriaeth atebolrwydd cyfyngedig

1 Alla i ddewis unrhyw enw fynna i i’m partneriaeth atebolrwydd cyfyngedig?

Na allwch. Gall sawl rheoliad effeithio ar eich dewis. Er enghraifft, rhaid i enw pob partneriaeth atebolrwydd cyfyngedig ddiweddu yn y geiriau ‘Partneriaeth Atebolrwydd Cyfyngedig’ neu’r Saesneg cyfatebol ‘Limited Liability Partnership’ neu eu talfyriadau.

2 A ellid gwrthod yr enw ddewisais i?

Gellid:

• os yw ‘yr un fath’ ag enw sydd eisoes ar y mynegai – gweler cwestiwn 3 isod;

• os yw’n cynnwys y geiriau ‘partneriaeth atebolrwydd cyfyngedig’ unrhyw le arall ond ar ddiwedd yr enw. Mae hyn yr un mor wir am dalfyriadau neu fersiwn Saesneg y geiriau;

• os yw’n sarhaus;

• os byddai ei ddefnyddio’n dramgwydd troseddol;

• os yw’n cynnwys ‘SE’ (neu’r talfyriad SE rhwng cromfachau neu gydag atalnodi arall cyn neu ar ôl y talfyriad). Am ragor o wybodaeth, gweler ein llyfryn The European Company: Societas Europaea (SE).

Yn ychwanegol, mae eisiau cymeradwyaeth yr Ysgrifennydd Gwladol i rai enwau cyn bod modd eu cofrestru. Ymhlith y rhain mae enwau sy’n cynnwys geiriau a bennwyd o dan y rheoliadau (gweler cwestiwn 4) ac enwau sy’n awgrymu cysylltiad â llywodraeth ganolog neu leol.

Os osgoir y cyfyngiadau hyn, cewch fel arfer ddefnyddio’r enw a ddewiswyd gennych.

Gwnewch yn siŵr fod yr enw yr ydych chi am ei ddefnyddio yn dderbyniol cyn cwblhau’ch dogfen gorffori – Ffurflen LLP2 - neu cyn llenwi Ffurflen LLP3 i newid enw partneriaeth atebolrwydd cyfyngedig. Os byddwch yn amau, ffoniwch: Delete colon

3 Beth yw ystyr ‘yr un fath’?

Wrth benderfynu a yw enw ‘yr un fath’ ag enw arall, bydd y Cofrestrydd yn anwybyddu atalnodi, statws y bartneriaeth atebolrwydd cyfyngedig, a’r ‘y/yr’ ar ddechrau’r enw. Gellir derbyn enw sy’n swnio yr un fath ag un sydd eisoes ar y Mynegai Enwau Cwmnïau a Phartneriaethau Atebolrwydd Cyfyngedig os yw’r ddau enw wedi eu sillafu’n wahanol.

Er enghraifft, os yw’r enw ‘Diacen Cyfyngedig’ wedi ei gofrestru’n barod, yna fe wrthodid y canlynol:

• Diacen Partneriaeth Atebolrwydd Cyfyngedig (neu PAC)
• D ac N Partneriaeth Atebolrwydd Cyfyngedig (neu PAC)
• D & N Partneriaeth Atebolrwydd Cyfyngedig (neu PAC)

Dylech fod yn ymwybodol, os mabwysiadwch enw sy’n camarwain y cyhoedd i gredu bod eich busnes chi yn dilyn yr un gweithgarwch â busnes arall – er enghraifft, masnachu’n siop adrannol o dan yr enw ‘Harrods’ – yna fe allai’r person y gwnaethoch effeithio ar ei fusnes/busnes ddwyn achos yn eich erbyn am ‘ymhonni’. Nid yw cofrestru enw gyda Thŷ’r Cwmnïau yn warant eich bod yn ddiogel rhag achos cyfreithiol o’r fath.

Yn ychwanegol, os oes cofrestriad nod masnach neu gais am nod neu gais sy’n cynnwys nod sydd yr un fath ag enw sydd wedi ei gofrestru neu’n debyg i un, gallwch wynebu achos cyfreithiol am dor-nod masnach. Fe’ch cynghorir, felly, i ymgynghori â thwrnai nodau masnach neu gyfreithiwr cyn defnyddio’r enw. I ddod o hyd i dwrnai nodau masnach, cysylltwch â’r Sefydliad Twrneiod Nodau Masnach ar 020 8686 2052 neu ymwelwch ag www.itma.org. uk. I ddod o hyd i gyfreithiwr, cysylltwch â Chymdeithas y Gyfraith ar 0870 606 6575 neu ymwelwch ag www.lawsociety.org.uk

Gallwch hefyd wirio’r Gofrestr Nodau Masnach yn y Swyddfa Eiddo Deallusol y D.G. cyn cofrestru enw yn Nhŷ’r Cwmnïau. Hyd yn oed os na chwyd Tŷ’r Cwmnïau wrthwynebiad “rhy debyg” i’ch enw, nid yw hynny’n rhoi ichi amddiffyniad rhag unrhyw honiad dilynol ynglŷn â thor-nod masnach neu ymhonni. Eich cyfrifoldeb chi yw cadarnhau bod yr enw'n rhydd i'w ddefnyddio.

Am gyngor pellach, gan gynnwys sut i chwilio’r Gofrestr Nodau Masnach, cysylltwch â Chofrestrfa Nodau Masnach y Swyddfa Eiddo Deallusol y D.G. ar:

e-bost: enquiries@ipo.gov.uk

Gwefan: www.ipo.gov.uk

Teleffon: 08459 500 505

Nedidiodd y Swyddfa Patentau newid ei henw i Swyddfa Eiddo Deallusol y D.G. (UK-IPO) ar 2 Ebrill 2007.

Mae cofrestru enw’n atal partneriaeth atebolrwydd cyfyngedig arall rhag bod â’r un enw, ond nid yw’n atal defnyddio’r enw fel enw masnachu neu enw busnes, ac eithrio o dan yr amgylchiadau a ddisgrifiwyd uchod.

4 Pa enwau sydd angen cymeradwyaeth?

Yr enwau sydd angen cymeradwyaeth yw’r rhai sy’n cynnwys geiriau neu ymadroddion a nodir o dan reoliadau statudol ac enwau sy’n rhoi’r argraff bod y bartneriaeth yn gysylltiedig â Llywodraeth Ei Mawrhydi neu ag awdurdod lleol. Gwelir rhestri llawn o’r geiriau ‘sensitif’ yn Atodiadau A, B ac C, a rhoir gwybodaeth bellach am eiriau sensitif ym mhennod 4.

5 Beth os oes eisiau cymeradwyaeth i’r enw ddewisais i?

Os dewiswch chi enw partneriaeth atebolrwydd cyfyngedig sydd angen cymeradwyaeth yr Ysgrifennydd Gwladol dros Fusnes, Menter a Diwygio Rheoleiddio cyn ei ddefnyddio, cysylltwch â’r Tîm Partneriaethau Atebolrwydd Cyfyngedig yn Nhŷ’r Cwmnïau, Caerdydd neu Gaeredin yn ôl sy’n briodol, cyn ichi ymrwymo, a gofyn am wybodaeth ynghylch y rheolau sy’n llywio defnyddio’r gair a ddewiswyd gennych.

• Os dewiswch chi enw sy’n cynnwys unrhyw un o’r geiriau a restrir yn Atodiad A, mae’n debyg y gofynnir ichi gyflenwi gwybodaeth ategol cyn inni gofrestru’r enw. Dylech ysgrifennu, gan amgáu gwybodaeth yn ategu’ch cais, at yr Ysgrifennydd Gwladol dros Fasnach a Diwydiant yn Nhŷ’r Cwmnïau yng Nghaerdydd (i bartneriaethau atebolrwydd cyfyngedig Cymreig neu Seisnig) neu Gaeredin (i bartneriaethau atebolrwydd cyfyngedig Albanaidd). Gwelir y ddau gyfeiriad yng nghefn y llyfryn hwn.

• Os yw’r enw a ddewiswyd gennych yn cynnwys unrhyw un o’r geiriau a restrir yn Atodiad B, yna bydd angen ichi ysgrifennu at y ‘corff perthnasol’ i ofyn a oes ganddynt wrthwynebiad (ac os oes, pam) i ddefnyddio’r gair neu’r ymadrodd yn enw’ch partneriaeth atebolrwydd cyfyngedig. Wrth ysgrifennu at yr Ysgrifennydd Gwladol dros Fasnach a Diwydiant yn Nhŷ’r Cwmnïau, Caerdydd neu Gaeredin, i geisio cymeradwyaeth i’r enw, bydd rhaid ichi amgáu copi o unrhyw ateb a gawsoch gan y ‘corff perthnasol’.

• Mae deddfwriaeth arall yn rhychwantu defnyddio rhai geiriau ac ymadroddion a gallai eu camarfer yn enwau partneriaethau atebolrwydd cyfyngedig fod yn dramgwydd troseddol. Rhestrir y rhai sy’n wybyddus i Dŷ’r Cwmnïau yn Atodiad C. Os hoffech chi gynnwys un o’r geiriau neu ymadroddion hyn yn enw’ch partneriaeth atebolrwydd cyfyngedig, yna dylech gysylltu â’r awdurdod rheoleiddio perthnasol neu geisio cyngor gennym ni.

• Os yw’r enw a ddewiswyd gennych yn rhoi’r argraff bod eich partneriaeth atebolrwydd cyfyngedig yn gysylltiedig â Llywodraeth Ei Mawrhydi neu ag awdurdod lleol, yna bydd arnoch chi angen cymeradwyaeth ysgrifenedig yr Ysgrifennydd Gwladol dros Fasnach a Diwydiant cyn bod modd cofrestru’r enw. Ysgrifennwch at yr Ysgrifennydd Gwladol dros Fasnach a Diwydiant yn Nhŷ’r Cwmnïau, Caerdydd neu Gaeredin yn ôl sy’n briodol, gan roi cymaint o fanylion ag y gallwch i ategu’ch cais. Fel arfer, dim ond lle gallwch chi ddangos bod cyswllt go iawn yn bodoli a lle bo’r corff llywodraeth perthnasol yn cefnogi’r cais y caiff enwau o’r fath eu cymeradwyo. Gweler pennod 4.

6 Sut dylwn i gofrestru enw fy mhartneriaeth atebolrwydd cyfyngedig?

Os nad yw’r enw a ddewiswyd gennych eisoes ar y Mynegai Enwau Cwmnïau a Phartneriaethau Atebolrwydd Cyfyngedig ac nad yw yn un sydd eisiau cymeradwyaeth yr Ysgrifennydd Gwladol, anfonwch eich dogfen gorffori (neu Ffurflen LLP3 os yw partneriaeth atebolrwydd cyfyngedig presennol yn newid ei henw) at:

• y Tîm Partneriaethau Atebolrwydd Cyfyngedig, Caerdydd, ar gyfer partneriaethau atebolrwydd cyfyngedig sydd wedi eu cofrestru yng Nghymru a Lloegr; neu at

• Gofrestrydd Cwmnïau’r Alban ar gyfer partneriaethau atebolrwydd cyfyngedig sydd wedi cofrestru yn yr Alban.

Os yw’ch dogfennau’n gywir, caiff enw’r bartneriaeth atebolrwydd cyfyngedig ei gofrestru ac fe roir tystysgrif gorffori.

Mae rhagor o wybodaeth am gorffori partneriaethau atebolrwydd cyfyngedig i’w chael ym mhennod 1 o’r llyfryn hwn. Rhoir gwybodaeth am newid enw partneriaeth atebolrwydd cyfyngedig ym mhennod 3.

PENNOD 3

Newid enw partneriaeth atebolrwydd cyfyngedig

1 Oes unrhyw gyfyngiadau ar yr enw newydd y caiff partneriaeth atebolrwydd cyfyngedig ei ddewis?

Oes. Mae’r rhain yr un fath â’r cyfyngiadau sy’n gymwys i bartneriaeth atebolrwydd cyfyngedig newydd sy’n gwneud cais am gofrestriad. Felly, cyn penderfynu ar enw newydd i’ch partneriaeth atebolrwydd cyfyngedig, darllenwch bennod 2. Os dewiswch chi enw annerbyniol, ni fyddwn yn ei gofrestru.

Os cofrestrir enw sy’n rhy debyg i un sydd eisoes ar y mynegai a bod gwrthwynebiad yn cael ei wneud, yna gall yr Ysgrifennydd Gwladol gyfarwyddo’ch partneriaeth atebolrwydd cyfyngedig i newid ei henw. Am wybodaeth ynghylch pwerau’r Ysgrifennydd Gwladol, gweler pennod 5.

2 Sut newidir yr enw?

Rhaid i’r bartneriaeth atebolrwydd cyfyngedig lenwi Ffurflen LLP3. Wedyn, rhaid i’r ffurflen gael ei llofnodi gan aelod dynodedig a’i hanfon at y Cofrestrydd, ynghyd â’r ffi (gweler isod). Os bydd popeth yn iawn, aiff Tŷ’r Cwmnïau ymlaen i brosesu’r ffurflen a rhoi Tystysgrif Corffori wrth Newid Enw. Ni newidir enw’r bartneriaeth atebolrwydd cyfyngedig nes rhoi’r dystysgrif newydd. Fel arfer, fe gaiff y newid enw ei brosesu o fewn pum diwrnod gwaith i dderbyn y dogfennau yn Nhŷ’r Cwmnïau. Cynigiwn hefyd wasanaeth premiwm cofrestru yr un diwrnod yn ein swyddfeydd yng Nghaerdydd a Chaeredin, yn ogystal â thrwy’n Canolfan Gwybodaeth yn Llundain.

3 Faint mae Tŷ’r Cwmnïau yn ei godi am newid enw?

Y ffi gofrestru o dan y gwasanaeth safonol yw £10. Ffi’r gwasanaeth premiwm yw £50. Dylid gwneud sieciau’n daladwy i “Tŷ’r Cwmnïau”.

Os dewiswch y gwasanaeth premiwm, fe wnawn ein gorau i gofrestru’r newid enw yr un diwrnod â derbyn Ffurflen LLP3, cyhyd â’ch bod yn ei chyflwyno inni, wedi ei chwblhau’n gywir ac ar ddiwyg derbyniol, cyn 3pm. Os byddwn am unrhyw reswm yn methu rhoi ichi wasanaeth yr un diwrnod, byddwn yn ad-dalu gwahaniaeth y gost rhwng y gwasanaeth safonol a’r gwasanaeth premiwm.

Os postiwch eich cais am wasanaeth yr un diwrnod, fe wnawn bob ymdrech i gofrestru’r newid enw yr un diwrnod ag y bydd y cais yn dod i law. Os yw’ch cais yn un taer, hwyrach y byddwch am ystyried a fyddai’n ddoeth defnyddio Gwasanaeth Dosbarthu Arbennig y Post Brenhinol.

PENNOD 4

Geiriau ac ymadroddion sensitif

1 Beth yw ‘geiriau ac ymadroddion sensitif’?

Mae’r rhain yn eiriau ac ymadroddion a all, o’u defnyddio yn enw partneriaeth atebolrwydd cyfyngedig, awgrymu blaenoriaeth fusnes, statws neilltuol neu swyddogaeth benodol. Am y rheswm hwn, cawsant eu pennu o dan y rheoliadau fel rhai sy’n gofyn cymeradwyaeth yr Ysgrifennydd Gwladol. Y nod yw sicrhau bod cyfiawnhad dros ddefnyddio’r gair fel na chaiff y cyhoedd mo’i gamarwain gan yr enw. Ni roddir caniatâd oni bai fod yr wybodaeth a gyflwynir gennych yn dangos bod y bartneriaeth yn cwrdd â'r amodau perthnasol adeg cofrestru neu'n fuan ar ôl hynny. Gweithredwn ar ran yr Ysgrifennydd Gwladol wrth ddelio â cheisiadau am gymeradwyo geiriau ac ymadroddion o’r fath.

Mae’r bennod hon yn rhoi canllawiau i’r amodau y bydd angen i’ch partneriaeth atebolrwydd cyfyngedig eu bodloni os dymunwch chi ddefnyddio un o’r geiriau a restrir yn Atodiad A.

2 Pa fath o eiriau ac ymadroddion sy’n sensitif?

Mae’r geiriau canlynol yn awgrymu blaenoriaeth genedlaethol neu ryngwladol:

British – bydd cymeradwyaeth i’r gair hwn yn enw’ch partneriaeth atebolrwydd cyfyngedig yn dibynnu ar sut y caiff ei ddefnyddio. Fel arfer, byddai’r Ysgrifennydd Gwladol yn disgwyl i’r bartneriaeth atebolrwydd cyfyngedig fod o dan berchnogaeth Brydeinig. Byddai angen ichi ddangos bod y bartneriaeth yn amlwg yn ei faes drwy ddarparu tystiolaeth ategol gan ffynhonnell annibynnol megis adran o’r Llywodraeth neu gymdeithas fasnach. Os yw’r gair ‘British’ wedi ei oleddfu gan eiriau nad ydynt yn disgrifio gweithgarwch neu gynnyrch, er enghraifft drwy ddefnyddio gair ‘gwneud’, yna ni fydd tystiolaeth o flaenoriaeth o angenrheidrwydd yn hanfodol. Ond byddai disgwyl ichi ddangos bod eich partneriaeth atebolrwydd cyfyngedig yn un sylweddol o ran ei weithgarwch neu ei gynnyrch a’i fod yn amlwg yn ei faes ei hun.

England, English, Scotland, Scottish, Wales, Welsh, Ireland neu Irish – os dymunwch chi ddefnyddio’r geiriau hyn o flaen enw’ch partneriaeth atebolrwydd cyfyngedig, mae’r rheolau’n debyg i’r rhai ar gyfer ‘British’. Fel arfer, fe gewch gymeradwyaeth i ddefnyddio unrhyw un o’r geiriau hyn ar ôl yr enw os dangoswch fod prif leoliad busnes y bartneriaeth atebolrwydd cyfyngedig yn y wlad dan sylw. Os dymunwch ddefnyddio un o’r geiriau hyn am ei fod yn gyfenw, fe roir cymeradwyaeth ichi fel arfer ar yr amod bod enw’r bartneriaeth atebolrwydd cyfyngedig yn cynnwys enwau cyntaf neu flaenlythrennau.

European – ni chymeradwyir enwau sy’n cynnwys y gair hwn os awgrymant, yn ddigyfiawnhad, gyswllt â chyrff swyddogol Undeb Ewrop. Os oes cyswllt go iawn â chorff swyddogol, fe ellir caniatáu’r enw lle bo’r corff perthnasol yn cefnogi’r cais.

Great Britain neu United Kingdom – os dymunwch chi ddefnyddio’r ymadroddion hyn o flaen yr enw, neu ddefnyddio ‘of Great Britain’ neu ‘of the United Kingdom’ar ei ôl, yna mae’r meini prawf yr un fath â’r rhai ar gyfer ‘British’. Os defnyddir y geiriau ar ôl yr enw, cânt eu caniatáu fel arfer yn ddidrafferth. Nid oes eisiau cymeradwyaeth i ddefnyddio’r blaenlythrennau ‘GB’ neu ‘UK’ yn enw’ch partneriaeth atebolrwydd cyfyngedig.

International – os dymunwch ddefnyddio’r gair hwn o flaen yr enw, bydd angen ichi ddangos bod masnachu tramor yn cyfrif am ran helaeth o weithgareddau’r bartneriaeth atebolrwydd cyfyngedig. Os dymunwch ei ddefnyddio ar ei ôl, yna fe roir cymeradwyaeth fel arfer ar yr amod y gallwch chi ddangos bod y bartneriaeth atebolrwydd cyfyngedig yn gweithredu mewn dwy neu ragor o wledydd tramor.

National – mae’r meini prawf ar gyfer y gair hwn yr un fath ag ar gyfer ‘British’.

Mae’r geiriau canlynol yn awgrymu blaenoriaeth fusnes neu statws cynrychioliadol neu awdurdodol:

authority, board neu council – os dymunwch chi ddefnyddio unrhyw un o’r geiriau hyn, dylech geisio cyngor gennym ni. Os yw’r bartneriaeth atebolrwydd cyfyngedig i gael ei chofrestru yn yr Alban, cysylltwch â Thŷ’r Cwmnïau yng Nghaeredin.

institute neu institution – dim ond i’r cyrff hynny sy’n gwneud gwaith ymchwil ar y lefel uchaf neu i gyrff proffesiynol o’r rheng flaen y rhoir cymeradwyaeth i ddefnyddio’r geiriau hyn fel arfer. Bydd eisiau ichi ddangos inni fod angen y sefydliad a arfaethir a bod ganddo reoliadau priodol neu safonau archwilio. Bydd eisiau ichi sicrhau tystiolaeth o gefnogaeth cyrff cynrychioliadol ac annibynnol eraill.

Mae’r geiriau canlynol yn awgrymu amcanion neu swyddogaethau penodol:

charter neu chartered – gwrthodir enwau sy’n cynnwys y geiriau hyn os rhoddant yr argraff, yn ddigyfiawnhad, fod gan y bartneriaeth atebolrwydd cyfyngedig Siarter Frenhinol. Os defnyddir y geiriau i ddisgrifio proffesiwn, fe geisiwn gyngor y corff llywodraethu priodol cyn ystyried p’un ai i roi cymeradwyaeth.

chemist neu chemistry – os dymunwch chi ddefnyddio’r geiriau hyn, dylech geisio cyngor Tŷ’r Cwmnïau yng Nghaerdydd. Os yw’r bartneriaeth atebolrwydd cyfyngedig i gael ei chofrestru yn yr Alban, cysylltwch â Thŷ’r Cwmnïau yng Nghaeredin.

group - os yw defnyddio’r gair hwn yn awgrymu sawl partneriaeth atebolrwydd cyfyngedig o dan un berchnogaeth gorfforaethol, yna bydd angen ichi ddarparu tystiolaeth o’r cyd-gymdeithasu â dau neu ragor o bartneriaethau Prydeinig neu dramor. Os yw’r enw’n dangos yn glir fod y bartneriaeth atebolrwydd cyfyngedig i hybu buddiannau grŵp o unigolion, yna fe gaiff yr enw ei gymeradwyo fel arfer.

holding(s) – rhaid i bartneriaeth atebolrwydd cyfyngedig sydd am ddefnyddio’r gair hwn fod yn bartneriaeth atebolrwydd cyfyngedig ddal yn unol â diffiniad adran 736 o Ddeddf Cwmnïau 1985.

patent neu patentee – dim ond lle nad yw’r enw’n groes i Ddeddf Hawlfraint, Dyluniadau a Phatentau 1988 y cymeradwyir enw sy’n cynnwys y naill neu’r llall o’r geiriau hyn.

post office – rydym yn debygol o geisio cyngor ar geisiadau sy’n cynnwys y geiriau hyn.

register neu registered – byddwn yn trin pob cais am ddefnyddio’r geiriau hyn yn ôl ei rinweddau. At ei gilydd, fe geisiwn ni gyngor y corff llywodraethu priodol lle bo enwau sy’n cynnwys y geiriau hyn wedi eu cysylltu â chymhwyster proffesiynol. Ni chofrestrir mo’r enw os awgryma, yn ddigyfiawnhad, gysylltiad â Llywodraeth Ei Mawrhydi neu awdurdod lleol. Os oes cysylltiad gwirioneddol o’r fath, fe ellir caniatáu’r enw lle bo’r corff priodol yn cefnogi’r cais.

Sheffield – os dymunwch chi ddefnyddio enw sy’n cynnwys y gair ‘Sheffield’, bydd angen inni gadarnhau manylion lleoliad y bartneriaeth atebolrwydd cyfyngedig a’i gweithgareddau busnes. Byddwn hefyd yn ymgynghori â Chwmni’r Cyllellwyr yn Hallamshire.

trade union – gwrthodir enwau’n cynnwys yr ymadrodd hon fel arfer, oni chydymffurfiant â’r ddeddfwriaeth ynglŷn ag undebau llafur.

PENNOD 5

Cyfarwyddyd i newid enw partneriaeth atebolrwydd cyfyngedig

1 Beth yw ‘cyfarwyddyd’?

Mae cyfarwyddyd i newid enw partneriaeth atebolrwydd cyfyngedig yn orchymyn cyfreithiol i bartneriaeth atebolrwydd cyfyngedig gwblhau Ffurflen LLP3 i fabwysiadu enw newydd a chofrestru’r newid yn Nhŷ’r Cwmnïau o fewn cyfnod penodol. Gellir rhoi cyfarwyddyd, er enghraifft, yn sgil cyflwyno gwrthwynebiad gan rywun sydd â buddiant oherwydd bod un enw yn ‘rhy debyg’ i un arall. Mae’r bennod hon yn egluro sut i gyflwyno gwrthwynebiad, beth a ystyrir wrth benderfynu a yw un enw’n rhy debyg i un arall ac, yn gyffredinol, pryd y gellir rhoi cyfarwyddyd.

2 Pwy all gyfarwyddo partneriaeth atebolrwydd cyfyngedig i newid ei henw?

Mae gan yr Ysgrifennydd Gwladol bwerau statudol i gyfarwyddo partneriaeth atebolrwydd cyfyngedig i newid ei henw o dan amgylchiadau arbennig.

3 Sut alla i wrthwynebu enw?

Os hoffech chi wrthwynebu enw, er enghraifft am y gallai ei debygrwydd i enw’ch partneriaeth atebolrwydd cyfyngedig chi arwain at ddryswch rhwng partneriaethau atebolrwydd cyfyngedig, yna rhaid ichi ysgrifennu at:

Ar gyfer partneriaethau atebolrwydd cyfyngedig wedi eu corffori yng Nghymru a Lloegr:

Yr Ysgrifennydd Gwladol dros Fusnes, Menter a Diwygio Rheoleiddio
Adran Cwmnïau Newydd
Cangen Gweinyddu Cwmnïau
Tŷ’r Cwmnïau
Ffordd y Goron
Caerdydd CF14 3UZ
Ar gyfer partneriaethau atebolrwydd cyfyngedig wedi eu corffori yn yr Alban:
The Secretary of State for Business, Enterprise and Regulatory Reform
New Companies Section
Companies House
37 Castle Terrace
Edinburgh
EH1 2EB

4 Beth yw ystyr ‘rhy debyg’?

Yn gyntaf oll, bydd yr Ysgrifennydd Gwladol yn edrych ar y ddau enw. Dim ond os ymddengys bod y ddau enw’n gyffelyb y bydd yn ystyried a ydynt yn ‘rhy debyg’ – hynny yw, a oes perygl dryswch rhwng partneriaethau atebolrwydd cyfyngedig.

Os oes gwahaniaeth o un neu ragor o eiriau rhwng yr enwau, gall hyn awgrymu nad ydyn nhw’n ‘rhy debyg’, gan ddibynnu, er enghraifft, ar y gair/geiriau a hyd yr enwau dan sylw.

Os mewn mân bethau yn unig y mae’r enwau’n gwahaniaethu, gall hyn awgrymu bod yr enwau yn ‘rhy debyg’ ac mewn amgylchiadau felly fe ellir rhoi cyfarwyddyd. Enghreifftiau posibl yw:

• Lle nad yw ond llythyren neu ddwy yn cyfrif am y gwahaniaeth, yn enwedig pan fo’r rheiny’n cyfleu lluosog gair a gynhwysir mewn enw ar y gofrestr a fyddai fel arall yn hollol yr un fath.
• Lle bo geiriau byr yn gwahaniaethu rhwng yr enwau, yn enwedig geiriau o gymeriad generig megis ‘GB’ neu ‘UK’  neu ‘.com’.
• Lle bo geiriau ychydig yn hwy, efallai, yn gwahaniaethu rhwng yr enwau a bod ganddynt elfennau sylweddol a/neu arbennig iawn yn gyffredin.
• Lle gwahaniaethant o ran y ffordd y defnyddir symbolau yn unig.

Nodyn: dim ond enw corfforaethol llawn y bartneriaeth atebolrwydd cyfyngedig y gellir ei ystyried.

5 Beth os yw’r enw’n awgrymu cysylltiad â phartneriaeth atebolrwydd cyfyngedig sydd eisoes ar y mynegai?

Ni fydd yr Ysgrifennydd Gwladol yn ystyried unrhyw agwedd ar ‘berthynas ymhlyg’ – hynny yw, a ellid tybied bod y bartneriaeth atebolrwydd cyfyngedig yn aelod o bartneriaeth neu grŵp o bartneriaethau atebolrwydd cyfyngedig arbennig, neu’n gysylltiedig. Nid ystyria ychwaith y ffordd y defnyddir enwau masnach neu enwau busnes, logos, perchnogaeth nodau masach neu wasanaeth cofrestredig, hawlfreintiau, patentau ac ati, nac unrhyw hawliau perchnogol eraill sydd ynghlwm wrth enwau neu rannau o enwau.

6 Sut y delir â gwrthwynebiadau?

Rhai dewisol yw pwerau’r Ysgrifennydd Gwladol ac ystyrir pob achos yn ôl ei rinweddau. Bydd yr Ysgrifennydd Gwladol fel arfer yn rhoi gwybod i’r bartneriaeth atebolrwydd cyfyngedig yr arfaetha gyfarwyddo ei bod yn newid ei henw, fel bod modd i’r bartneriaeth atebolrwydd cyfyngedig honno gyflwyno unrhyw dystiolaeth a wêl yn briodol i gyfiawnhau cadw’r enw presennol. Wrth ddod i benderfyniad, fe ystyrir unrhyw wybodaeth berthnasol a ddarperir i ategu neu wrthod yr achos sy’n honni dryswch rhwng partneriaethau atebolrwydd cyfyngedig fel partneriaethau atebolrwydd cyfyngedig felly (ond nid rhwng partneriaethau atebolrwydd cyfyngedig fel y cânt eu cynrychioli gan eu teitl masnachu, eu dull gweithredu neu eu gweithgarwch).

7 Pryd y gellir rhoi cyfarwyddyd?

Gellir cyfarwyddo partneriaeth atebolrwydd cyfyngedig i newid ei henw:

• fewn 12 mis i ddyddiad ei chofrestru os yw’r enw yr un fath ag enw sy’n ymddangos (neu a ddylai fod wedi ymddangos) ar y mynegai adeg y cofrestru, neu sydd, ym marn yr Ysgrifennydd Gwladol, yn ‘rhy debyg’ i enw felly.
• fewn pum mlynedd i’w chofrestru lle bo gan yr Ysgrifennydd Gwladol sail i gredu ei bod wedi darparu gwybodaeth gamarweiniol at ddibenion y cofrestru, neu wedi derbyn, at ddibenion y cofrestru, ymgymeriadau neu wedi rhoi sicrhad na wireddwyd mohonynt.
• Unrhyw bryd os yw’r enw’n rhoi argraff mor gamarweiniol o natur gweithgareddau’r bartneriaeth atebolrwydd cyfyngedig fel ei fod yn debyg o niweidio lles y cyhoedd. Rhai cydymffurfio â’r cyfarwyddyd hwn o fewn chwe wythnos, oni wneir cais i’r Llys am iddo gael ei ddirymu. (Adran 32, Deddf Cwmnïau 1985).

8 A ellir gwrthod enw ‘rhy debyg’ cyn cofrestru’r bartneriaeth atebolrwydd cyfyngedig?

Na ellir. Er bod yr enw a arfaethir i bartneriaeth atebolrwydd cyfyngedig yn cael ei wrthod os yw ‘yr un fath’ ag enw partneriaeth atebolrwydd cyfyngedig sy’n bodoli eisoes, nid oes pŵer i wrthod enw ar y sail ei fod yn ‘rhy debyg’ i enw partneriaeth atebolrwydd cyfyngedig arall.

Mae er eich lles eich hun ichi sicrhau bod yr enw a ddewiswch i’ch partneriaeth atebolrwydd cyfyngedig yn ddigon gwahanol i unrhyw enw arall ar y gofrestr. Bydd hynny’n lleihau perygl dryswch, ynghyd â’r anawsterau posibl canlynol:

• gwrthwynebiadau i enw’r bartneriaeth atebolrwydd cyfyngedig;
• dryswch rhyngoch chi â phartneriaethau atebolrwydd cyfyngedig eraill sydd â hanes masnachu gwael;
• gweithrediadau ‘ymhonni’ o dan y gyfraith sifil.

PENNOD 6

Cyhoeddi enw partneriaeth atebolrwydd cyfyngedig, a’r manylion sydd i’w dangos ar ei deunydd ysgrifennu

Mae’n rhaid i’ch partneriaeth atebolrwydd cyfyngedig nodi ei henw (fel yr ymddengys yn ei Dogfen Gorffori, Ffurflen LLP2) mewn mannau arbennig ac ar ddeunydd ysgrifennu’r busnes. Rhaid i’ch partneriaeth atebolrwydd cyfyngedig hefyd roi gwybodaeth arbennig ar ei holl lythyrau busnes a ffurflenni archebu.

1 Ble mae’n rhaid dangos enw’r bartneriaeth atebolrwydd cyfyngedig?

Rhaid i bob partneriaeth atebolrwydd cyfyngedig beintio neu osod ei henw y tu allan i bob swyddfa neu leoliad lle dilynir busnes – hyd yn oed os cartref un o’r aelodau fydd hynny. Rhaid i’r enw fod wedi ei beintio neu ei osod yn gyson a rhaid iddo fod yn amlwg ac yn ddarllenadwy.

2 Ar ba ddogfennau mae’n rhaid dangos enw’r bartneriaeth atebolrwydd cyfyngedig?

O 1 Ionawr 2007 ymlaen, p’un i ar gopi caled, drwy ddull electronig neu ar unrhyw ddiwyg arall –

Rhaid i’r bartneriaeth atebolrwydd cyfyngedig nodi ei henw, mewn ysgrifen ddarllenadwy, ar y canlynol:

• holl lythyrau busnes a ffurflenni archebu’r bartneriaeth atebolrwydd cyfyngedig;
• ei holl hysbysiadau a chyhoeddiadau swyddogol eraill;
• pob bil cyfnewid, addaweb, arnodiad, siec ac archeb arian neu archeb nwyddau yr honnir ei bod wedi ei llofnodi gan neu ar ran y bartneriaeth atebolrwydd cyfyngedig;
• ei holl ddatganiadau o eitemau taladwy, anfonebau, derbynebau a llythyrau credyd;
• ar ei holl wefannau.

3 Oes rhaid i’r bartneriaeth atebolrwydd cyfyngedig ddangos unrhyw fanylion eraill?

Oes. Ar ei holl lythyrau busnes, ffurflenni archebu (p’un ai ar gopi caled, drwy ddull electronig neu ar unrhyw ddiwyg arall) neu ar bob un o’i gwefannau, mae’n rhaid i’r bartneriaeth atebolrwydd cyfyngedig ddangos mewn ysgrifen ddarllenadwy:

• Leoliad ei gofrestru a’i rif cofrestru.

Rhaid i’r lleoliad cofrestru fod yn un o’r canlynol, fel y bo’n briodol:

• Y ffaith mai partneriaeth atebolrwydd cyfyngedig ydyw.
• Cyfeiriad ei swyddfa gofrestredig. Os bydd llythyr busnes, ffurflen archebu neu unrhyw un o wefannau’r bartneriaeth atebolrwydd cyfyngedig yn sôn am fwy nag un cyfeiriad, argymhellir eich bod yn nodi p’un o’r cyfeiriadau yw cyfeiriad y swyddfa gofrestredig.

4 Beth os yw’r bartneriaeth atebolrwydd cyfyngedig yn cael ei dirwyn i ben?

Os yw’r bartneriaeth atebolrwydd cyfyngedig yn cael ei dirwyn i ben, mae’n rhaid i bob anfoneb, archeb nwyddau, llythyr busnes neu ffurflen archebu (p’un ai ar gopi caled, drwy ddull electronig neu ar unrhyw ddiwyg arall) a’i holl wefannau gynnwys datganiad bod y bartneriaeth atebolrwydd cyfyngedig yn cael ei dirwyn i ben.

PENNOD 7

Y bartneriaeth atebolrwydd cyfyngedig newydd – edrych ymlaen

1 Pa wybodaeth sydd angen ar Dŷ’r Cwmnïau?

Os yw’r bartneriaeth atebolrwydd cyfyngedig yn cael ei dirwyn i ben, mae’n rhaid i bob anfoneb, archeb nwyddau, llythyr busnes neu ffurflen archebu (p’un ai ar gopi caled, drwy ddull electronig neu ar unrhyw ddiwyg arall) a’i holl wefannau gynnwys datganiad bod y bartneriaeth atebolrwydd cyfyngedig yn cael ei dirwyn i ben.

2 Pa gyfnod y dylai’r cyfrifon ei fodloni?

Rhaid i gyfrifon cynta’r bartneriaeth atebolrwydd cyfyngedig ddechrau o’r dyddiad corffori. Rhaid i’r flwyddyn ariannol gyntaf ddod i ben ar y ‘dyddiad cyfeirnod cyfrifeg’ neu ar ddyddiad hyd at saith diwrnod y naill ochr neu’r llall i’r dyddiad hwn (gweler cwestiwn 3). Bydd cyfrifon olynol yn dechrau ar y diwrnod ar ôl dyddiad diwedd-blwyddyn y cyfrifon blaenorol. Deuant i ben ar y ‘dyddiad cyfeirnod cyfrifeg’ nesaf neu ar ddyddiad hyd at saith diwrnod y naill ochr neu’r llall.

3 Sut pennir y dyddiad cyfeirnod cyfrifeg?

Y dyddiad cyfeirnod cyfrifeg yw dydd ola’r flwyddyn a fodlonir gan y cyfrifon. Bydd y dyddiad hwn yn dibynnu ar y dyddiad corffori, gan ei fod yn cyfateb i ddydd ola’r mis sy’n cynnwys y dyddiad corffori. Er enghraifft, os corfforir eich partneriaeth atebolrwydd cyfyngedig ar 2 Gorffennaf eleni, y dyddiad cyfeirnod cyfrifeg fydd 31 Gorffennaf, a bydd rhaid i’w blwyddyn ariannol gyntaf ddod i ben ar 31 Gorffennaf y flwyddyn nesaf (neu o fewn saith diwrnod i’r dyddiad hwnnw).

4 Oes modd newid y dyddiad cyfeirnod cyfrifeg?

Oes. Gallwch ei newid drwy anfon Ffurflen LLP225 at y Cofrestrydd. Rhaid ichi wneud hyn o fewn y cyfnod cyfrifeg yr effeithir arno gan y newid neu yn ystod y cyfnod a ganiateir ar gyfer cyflwyno’r cyfrifon cysylltiedig inni. Am ragor o wybodaeth, gweler ein llyfryn ‘Partneriaethau Atebolrwydd Cyfyngedig – Gweinyddu a Rheoli’.

5 Faint o amser sydd gen i i gyflwyno cyfrifon?

Mae’n rhaid cyflwyno cyfrifon cyntaf partneriaeth atebolrwydd cyfyngedig:

• fewn 10 mis i ddiwedd y cyfnod cyfeirnod cyfrifeg; neu
• os yw’r cyfnod cyfeirnod cyfrifeg yn hwy na 12 mis, o fewn 22 mis i’r dyddiad corffori, neu dri mis i ddiwedd y cyfnod cyfeirnod cyfrifeg, p’un bynnag sydd hwyaf.

6 Beth arall sy’n rhaid imi ei ddweud wrth Dŷ’r Cwmnïau?

Dyma rai o’r pethau pwysig y mae’n rhaid ichi ddweud wrthym amdanynt – gan ddefnyddio, yn y mwyafrif o enghreifftiau, ffurflen arbennig a ddarparwn, ac o fewn y cyfyngiadau amser a nodir.

• Newid aelodau ac aelodau dynodedig, o fewn 14 diwrnod. Ar gyfer penodiadau defnyddiwch Ffurflen LLP288a, ar gyfer ymddiswyddiadau defnyddiwch Ffurflen LLP288b, ac ar gyfer newid teitl defnyddiwch Ffurflen LLP8.
• Newid manylion aelodau ac aelodau dynodedig, o fewn 28 diwrnod, gan ddefnyddio Ffurflen LLP288c.
• Lleoliad cofrestr y dyledebwyr. Defnyddiwch Ffurflen LLP190.
• Manylion unrhyw forgais neu arwystl a greir gan y bartneriaeth atebolrwydd cyfyngedig, o fewn 21 diwrnod. Gweler ein llyfryn ‘Partneriaethau Atebolrwydd Cyfyngedig – Gweinyddu a Rheoli’.
• Newid swyddfa gofrestredig, o fewn 14 diwrnod. Defnyddiwch Ffurflen LLP287. Dim ond wrth inni gofrestru’r ffurflen y daw’r newid i rym cyfreithiol.

7 Beth am ffurflenni blynyddol?

Rhaid i bob partneriaeth atebolrwydd cyfyngedig gyflwyno ffurflen flynyddol i Dŷ’r Cwmnïau o leiaf unwaith bob 12 mis. Bydd ganddi 28 diwrnod o ddiwrnod ola’r cyfnod a fodlonir gan y ffurflen i wneud hyn.

8 Beth fydd Tŷ’r Cwmnïau yn ei wneud â’r wybodaeth a anfonir gan fy mhartneriaeth atebolrwydd cyfyngedig?

Rhaid inni drefnu i’r wybodaeth fod ar gael i unrhyw un sydd am ei gweld. Felly, fe gaiff yr wybodaeth a gyflwynwch ei hychwanegu at eich cofnod a bydd ar gael i’w harchwilio gan y cyhoedd.

9 Beth sy’n digwydd os nad anfona i’r wybodaeth i Dŷ’r Cwmnïau mewn pryd?

Os cyflwynir eich cyfrifon ar ôl yr amser priodol, ceir cosb sifil awtomatig am ffeilio hwyr. Bydd y gosb hon rhwng £100 a £1,000. Mae rhagor o wybodaeth am gosbau ffeilio hwyr i’w chael yn ein llyfryn ‘Partneriaethau Atebolrwydd Cyfyngedig – Gweinyddu a Rheoli’.

Yn ychwanegol, gellir erlyn aelodau dynodedig am beidio â ffeilio dogfennau arbennig. O’u collfarnu, bydd ganddynt record droseddu a byddant yn agored i’w dirwyo hyd at £5,000 am bob tramgwydd. Mewn rhai enghreifftiau, gellid hefyd eu gwahardd rhag dal swydd aelod dynodedig neu gyfarwyddwr cwmni neu gymryd rhan yn rheolaeth unrhyw bartneriaeth atebolrwydd cyfyngedig neu gwmni am hyd at bum mlynedd.

10 Beth os na fydd y bartneriaeth atebolrwydd cyfyngedig yn llwyddo neu na fydd arna i ei hangen mwyach?

Gall partneriaethau atebolrwydd cyfyngedig sydd heb fasnachu na dilyn busnes mewn ffordd arall ers o leiaf tri mis wneud cais i’r Cofrestrydd am gael eu dileu o’r gofrestr. Am wybodaeth ynghylch hyn, a gweithrediadau ansolfedd anffurfiol, gweler ein llyfryn ‘Partneriaethau Atebolrwydd Cyfyngedig – Dirwyn i Ben’, neu i bartneriaethau atebolrwydd cyfyngedig sydd wedi eu cofrestru yn yr Alban, ‘Limited Liability Partnerships – Winding Up (Scotland)’.

PENNOD 8

Gwybodaeth bellach

1 Ble alla i gael cymorth?

Bydd ein staff yng Nghaerdydd a Chaeredin yn gallu’ch cynghori ynghylch materion yn gyffredinol, ond wrth ddechrau partneriaeth atebolrwydd cyfyngedig mae’n bwysig gwneud pethau’n iawn. Fel na fyddwch chi’n gwneud camgymeriadau a allai droi’n gostus, gall fod yn ddoeth ymgynghori â chyfreithiwr, asiant ffurfio, ysgrifennydd siartredig neu gyfrifydd fel sy’n briodol. Fe welir y cyfeiriadau yn y Tudalennau Melyn fel arfer.

Am ragor o wybodaeth ynghylch enwau sydd angen cymeradwyaeth yr Ysgrifennydd Gwladol, dylech chi ysgrifennu at:

Gallwch chi hefyd gael cyngor ynghylch defnyddio geiriau ac ymadroddion arbennig gan y cyrff perthnasol y gwelir eu henwau a’u cyfeiriadau yn yr Atodiadau.

2 Sut dylwn i anfon gwybodaeth at y Cofrestrydd?

Gallwch chi gyflwyno dogfennau i’r Cofrestrydd â llaw (yn bersonol neu drwy negesydd), gan gynnwys y tu allan i oriau swyddfa, dros wyliau banc a thros y penwythnos i Gaerdydd, Llundain a Chaeredin.

Gallwch chi hefyd gyflwyno dogfennau drwy’r post, drwy’r gwasanaeth Cyfnewid Dogfennau (DX) neu drwy’r Post Cyfreithiol (LP) yn yr Alban. Os anfonwch chi ddogfennau drwy’r post, byddwch cystal â’u cyfeirio at:

Os ydych yn anfon dogfennau drwy'r post, drwy negesydd neu drwy Gyfnewid Dogfennau (DX) a'ch bod yn dymuno cael derbynneb, bydd Tŷ'r Cwmnïau yn darparu cydnabyddiaeth os amgaewch gopi o'ch llythyr eglurhaol gydag amlen stampiedig ac arni eich cyfeiriad dychwelyd. Bydd y côd bar a roddwn ar eich llythyr yn cyfleu'r dyddiad dod i law ac fe ddychwelwn y copi yn yr amlen a ddarparwch.

Sylwer: nid yw cydnabyddiaeth dod i law yn golygu bod dogfen wedi ei derbyn i'w chofrestru yn Nhŷ'r Cwmnïau.

3 Ble galla i gael ffurflenni a llyfrynnau canllaw?

Mae hwn yn un o gyfres o lyfrynnau gan Dŷ’r Cwmnïau sy’n rhoi canllaw syml i’r Ddeddf Cwmnïau.

Mae ffurflenni statudol a llyfrynnau canllaw ar gael, yn rhad ac am ddim, gan Dŷ’r Cwmnïau. Y ffordd gyflymaf i’w cael yw drwy eu dadlwytho o’r wefan.  Neu fe allwch chi ffonio Tŷ’r Cwmnïau ar 0303 1234 500.

Os bydd yn well gennych, gallwch chi ysgrifennu at ein Timau Defnyddiau Ysgrifennu yng Nghaerdydd neu Gaeredin.

Gellir hefyd gael ffurflenni gan ddogfenwyr cyfreithiol, cyfrifwyr, cyfreithwyr ac asiantiaid ffurfio cwmnïau – cyfeiriadau mewn llyfrau ffôn ar gyfer busnesau.

ATODIAD A

Bydd arnoch chi angen cymeradwyaeth yr Ysgrifennydd Gwladol dros Fasnach a Diwydiant cyn defnyddio unrhyw rai o’r geiriau neu’r ymadroddion canlynol (neu eu ffurfiau lluosog neu feddiannol) yn yr enw a ddewiswch i’ch partneriaeth atebolrwydd cyfyngedig.

(a) Geiriau sy’n awgrymu blaenoriaeth genedlaethol neu ryngwladol:

British
England
English
European
Great Britain
International
Ireland
Irish
National
Scotland
Scottish
United Kingdom
Wales
Welsh

(b) Geiriau sy’n awgrymu blaenoriaeth fusnes neu statws cynrychioliadol neu awdurdodol:

Association
Authority
Board
Council
Federation
Institute
Institution
Society

(c) Geiriau sy’n awgrymu amcanion neu swyddogaethau penodol:

Assurance
Assurer
Benevolent
Charter
Chartered
Chemist
Chemistry
Co-operative
Foundation
Friendly society
Fund
Group
Holding
Industrial & provident society
Insurance
Insurer
Patent
Patentee
Post office
Reassurance
Reassurer
Register
Registered
Reinsurance
Reinsurer
Sheffield
Stock exchange
Trade union
Trust

ATODIAD B

Bydd angen cymeradwyaeth yr Ysgrifennydd Gwladol i eiriau neu ymadroddion yn y rhestr ganlynol. Os dymunwch ddefnyddio unrhyw un ohonynt yn enw’ch partneriaeth atebolrwydd cyfyngedig, bydd eisiau ichi ysgrifennu’n gyntaf i’r corff perthnasol i ofyn a oes ganddynt unrhyw wrthwynebiad i’r defnydd. Wrth wneud cais am gymeradwyaeth i ddefnyddio’r enw, dylech chi ddweud wrth Dŷ’r Cwmnïau eich bod wedi ysgrifennu i’r corff perthnasol ac amgáu copi o’r ateb a gawsoch.

ATODIAD C

Mae geiriau neu ymadroddion arbennig wedi eu rhychwantu gan ddeddfwriaeth arall a gallai eu defnyddio yn enw partneriaeth atebolrwydd cyfyngedig fod yn dramgwydd troseddol. Rhestrir y rhain isod. Os dymunwch ddefnyddio unrhyw un o’r enwau neu’r ymadroddion hyn yn enw’ch partneriaeth atebolrwydd cyfyngedig, yna dylech chi gysylltu â’r corff rheoleiddio perthnasol neu geisio cyngor gennym ni cyn bwrw ymlaen. Gallwn ninnau geisio cyngor annibynnol y corff perthnasol.